رفیع حیدر انجم
رفیع حیدر انجم کا مختصر سا تعارف
نام: محمد رفیع حیدر
قلمی نام: رفیع حیدر انجم
تاریخ پیدائش: 6، اکتوبر
مقام پیدائش: بھاگلپور، بہار
والدین: محمد شفیع حیدر
حمیرہ خاتون
حمیرہ خاتون
گاوں: ڈانگول، کٹیار (بہار)
تعلیم: ایم۔اے
شریک حیات: نیلوفر پروین
ثمر حیات: نایاب انجم
وسیلہ حیات: لائف انشورنس کارپوریشن آف انڈیا
پہلا افسانہ: ’’شمع ہر رنگ میں‘‘
پہلا مطبوعہ افسانہ: شمع ہر رنگ میں
(خوشبؤ ادب، کلکتہ، اگست، 1977)
افسانوی مجموعہ: ’’بے ارادہ‘‘ 1990
پتہ: اسٹیشن روڈ، آزاد نگر، ڈاکخانہ
ضلع ارریا، 854311
رفیع حیدر انجم کی شاعری
بغیر اخبار کا صحافی
واقعہ کچھ ہوا ہوگا وہاں
یا شاید کسی سانحے نے بھیڑ اکھٹا کی ہے
شہر کے تمام صحافی موجود ہیں اس نکڑ پر
اِدھر اُدھر بکھرے ہوئے
خبروں کو قلمبند کرتے ہوئے
ایک صحافی مگر بھیڑ سے الگ
اپنے ہم پیشوں سےجُدا
سگریٹ کے مرغولوں کے درمیاں
ڈھونڈرہا ہے کچھ
واقعہ سے باہر کی ایک خبر
جو کل کے اخبار کے کسی صفحے پر نہیں
برساتی کیچڑ سے بھرے ایک محلے کے
نیم تاریک سے ایک مکان کی دیوار پر
آج ہی چسپاں ہوگیا ہے
ہمیشہ کے لیے
بغیر پنکھے کا آدمی
کل شہر کی آرٹ گیلری میں
تصویروں کی نمائش تھی
میں نے ایک تصویر میں دیکھا
آزاد پرندے اُڑرہے ہیں
بے خوف و خطر
اپنے پنکھ کوپھیلائے دُور آسمان میں
تصویر دیکھ کر سوچا
کچھ آدمی کے بھی ہوتے ہیں پنکھ
بے بال و پر کے
نکل جاتے ہیں جو پروازِ تخیل کی بدولت
پرندوں سے بھی آگے
دُور اُفق کے اُس پار
ایسے ہی لوگ بناتے ہوں گے پورٹریٹ
انتہائی گرم دنوں میں
اپنے کمرے کے بے رنگ و روغن دیواروں کے درمیاں
برش، کینوس، ایزل اور رنگوں سے گھیرے ہوئے
موسم سے بے نیاز
لباس سے بے پرواہ
کسی پنکھے کے بغیر
اپنی تلاش کا لمحہ
تم آج نہیں ہو گھر پر
کتنے تنہا تنہا سے ہیں
یہ میز اور کرسیاں
یہ دیوار و در
اچھا ہے!
کچھ دیر اس تنہائی میں
خود سے مل کر پوچھوں گا
کہاں تھے اتنے دنوں؟
یہ کیا حال بنا رکھا ہے؟
کیوں کھوئے کھوئے
بکھرے بکھرے سے ہو؟
یقین نہیں آتا!
کیا وہ تم ہی ہو جو برسوں پہلے
اپنی تنہائی سے گھبرا کر
اک محفل میں جا بیٹھا تھا؟
ایک کلاسیکل ہے وقوف کی بازیافت
دین و دُنیا سے غافل
رضا و رغبت سے بے نیاز
اختر و انجم سے ناآشنا
اپنی ہی صِفت کا جو یا
اپنی ہی نرگسیت میں اُلجھا ہوا
اسی زمین کا ایک باشندہ
ایک ایسے شخص کو
ایک ایسے شخص نے ڈھونڈ نکالا ہے
جس کی گردن پر گُمنامی کا طوق پڑا تھا
جو اس شہر کے نقشے سے
دور کہیں حاشیئے پر کھڑا تھا
دانشورانِ شہر حیراں ہیں
محفلیں انگشت بدنداں ہیں
ادیبوں، شاعروں اور
سیاسی ایوانوں میں
شب و روز اک ہنگامہ ہے
عِلم و ہُنر کے سارے کلاسیکی خزینے
جن کی دسترس میں تھے
اپنی کم مائیگی پر شرمندہ ہیں
نہ جانے وہ کون سالمحہ تھا
جب اُن سے یہ چُوک ہوئی
ایک کلاسیکل ہے وقوف
اُن کی لاعلمی کا شکار ہوا
ایک مُدّت کے بعد
یہ رمَز کیوں آشکار ہوا
No comments:
Post a Comment